انا و مراتي و ميكي ماوس 

المرأه لما بتاخد رأيك في اي حاجه بتكون بالفعل محدده وجهتها و مش منتظره من الراجل اي رأي اصلا ، تقدر تقول انها بترضي غرور الراجل قال يعني بتستشيره و بتاخد من خبراته 

و اذا صادف الرجل رأيها بيكون الرضا و النور عليه و اذا خالف رأيها ......... الخساير لا يمكن توقعها ،،،،، 

كان فاضل يومين علي عيد الميلاد الاول لابنتي الثالثه و دي مناسبه لازم لها تحضيرات خاصه دي هتكمل اول سنه في مشوار الحياه ...

علي الواتس أب ارسلتلي مراتي مجموعه صور لكعكات عيد ميلاد مختلفه تقريبا ١٠٠٠ صوره مختومة بجمله : حبيبي اختار معايا شكل نعمله لعيد ميلاد النونو 

عاده اول ما ألاقي كلمه ( حبيبي ) في اول الرساله يبدأ القلق يظهر عندي من اللي هيحصل بعدها

اتفرجت علي الصور كلها صوره صوره لاني أكيد هادخل في امتحان صعب مع مراتي 

قولت اعمل ذكي و اهرب من المعركه المتوقعه من الاول ،،،، رديت عليها برساله ،،،

انا : حبيبتي كلهم حلوين إنتي دايما بتختاري حلو ما شاءلله عليكي 

مراتي : حبيبي لازم تختار معايا ده اول عيد ميلاد للنونو و مفيش وقت انا خلصت ديكورات عيد الميلاد في البيت مش فاضل غير التورته

انا : ايه ده بجد خلصتي كل حاجه ؟ طيب اديني عشر دقايق اختار و أرد عليكي ،،،،،

بعد عشر دقايق بالظبط اتصلت مراتي 

: انا بتفق علي التورته دلوقتي و لازم أقولهم علي الشكل لان مافيش وقت 

انا : شوفي يا روحي .....انا في وسط الصور لقيت صوره تورته عليها ميكي ماوس جميله قوي و النونو بتحب الشخصيه دي اعملي التورته نفس الشكل 

لحظات صمت من مراتي العزيزه مرت عليا كأنها دهر  ،،، و بدأ القلق و الرعب يركبني 

انا : حبيبتي إنتي معايا علي التليفون لسه ؟

مراتي : اه معاك بس مستغربه انك تسيب كل الأشكال اللي لونها بينكي و صور للبنات و تختار ميكي ماوس ...

انا : أصلي عارف انها بتحب الشخصيه و بعدين إنتي باعتهالي مع الصور اصلا....

مراتي : اه انا باعتاها بس مكنتش متوقعه انك تختار دي بالذات خصوصا انا عملت ديكورات البيت علي اللون البينكي و دي الوانها مختلفه!!!!

انا : و لا يهمك يا حبيبتي اختاري حاجه تانيه تمشي مع اللون البينكي عادي مش مشكله

مراتي بصوت رومانسي غير معتاد : لا يا حبيبي انا هاعملك التورته اللي نفسك فيها مش هازعلك أبدا 

 انا في خوف منها : لا و الله مش هازعل خالص اعملي اللي نفسك فيه

مراتي : لا خلاص هاعمل ميكي ماوس 

انا : اللي تشوفيه يا حبيبتي 

و اغلقت الخط وانا منبهر و مش مصدق انها تتنازل عن اختيارها بالسهولة دي خصوصا بعد ما عملت ديكورات البيت 

و حدثتني نفسي ،،، أكيد مراتي مش في طبيعتها النهارده خالص في شئ مختلف،،،، 

اخر الْيَوْمَ راجع البيت و لا بيا و لا عليا و بفتح باب البيت و اذ ألاقي مجموعه كبيره من صديقات زوجتي منتشرين في البيت ،،،؟؟ !!!!!!اللي متشعلقه علي سلم بتركب بالونات و اللي بتلون أوراق مختلفه و اللي قاعدين يعملوا طيارات و ألعاب تحس انك دخلت بيت العروسه .

انا بابتسامه خفيفه : مساء الخير 

مراتي بضحكه جميله : ايه رأيك في المفاجاه دي ؟ غيرتلك الديكور كله علشان افرحك هاعمل ديكور ميكي ماوس علشان يمشي مع شكل التورته 

وقفت مذهول في مكاني من اللي شفته لانها شالت كل حاجه عاملاها قبل كده و غيرتها تماما 

انا بصوت هامس : كل ده علشان انا اخترت ميكي ماوس يااااه معقول بجد ؟؟

مراتي متقمصه دور العاشقه الولهانه : كله يهون عشانك يا حبيبي 

و قبل ما اغرق في اوهام الحب و الرومانسيه و احلام اليقظه الرجولية 

لقيت مراتي بتديني مجموعه أوراق في أيدي 

مراتي : أمسك الفواتير دي ادفعها 

ببص في الفواتير نظره سريعه المجموع ٣٠٠٠ درهم !!!!!!! طبعا اتسمرت في مكاني و تقريبا جالي شلل مؤقت و نظرت الي مراتي نظره استفهام و استعطاف 

مراتي وهيا رافعه حاجب و منزله حاجب : يعني انت كنت مفكر أني هاسيب الديكور مش عامل ماشتينج مع التورته ،،،، و اكملت بسعاده : ايه رأيك بقا في المفاجاه دي

انا و مازلت لم استوعب الصدمة : بس يا حبيبتي ما كانش له لازمه المصاريف تاني كان الموضوع يمشي باي تورته و انا مكنتش هازعل و الله

مراتي و بدأت تتغير نبره الصوت : هو انت كده دايما مهما احاول ارضيك ما تفرحنيش أبدا

انا بصوت مرتعب : ما اقصدش يا روحي انا مقدر بس ما كانش له لازمه المصاريف تاني 

مراتي : يعني انت كنت عايز الضيوف يشوفوا الديكور مش ماتشينج مع التورته و يقولو عليا مش بفهم 

انا ناظرا للفواتير : بس ..... قاطعتني زوجتي : بس ايه ؟

انا : ده لو فرحها مش هنصرف كده

مراتي : لا فرحها ده حاجه تانيه خالص بس انت قول يارب 

انا هامسا لنفسي : ربنا يستر لحد ما تتخرج اصلا من الجامعة

مراتي بصوت أجش : انت بتقول حاجه ؟

انا مرتعدا : لا أبدا يا روحي دا انا فرحان و جالي فكره نكلم ديزني لاند  يبعتولنا ميكي ماوس نفسه بالطياره علشان يحضر عيد الميلاد 

مراتي بفرح : و الله فكره ، و نظرت الى صديقاتها ايه رأيكم يا بنات ......

و ده تقريبا اللي فاكره قبل ما ادخل في غيبوبه طويله ....،،