أنا و مراتي و الكنبه الموووووف  

صباح الفل كلنا اكيد عارفين العشق التاريخي للراجل و كنبه غرفه المعيشه ( Living room ) قدام التلفزيون ، و ده عشق ازلي و ثابت من فجر التاريخ ايام ما الكنبه كانت حته صخره الراجل بيحطها قدام الكهف و بيتفرج علي الديناصورات  
و كل الستات عارفينه و مسبب ليهم حاله هياج عصبي يومي ، خصوصا اذا كانت الكنبه غاليه عليها قوي و ده غالبا احساس موجود مع شويه من الغيره اليوميه من الكنبه اللي جوزها بيعشق جلوسه عليها و هو ماسك  الريموت كنترول بايد متنقلا بين قنوات الرياضه و الافلام و و مج النسكافيه بايد ....... ممارسا كل مظاهر الحياه من اكل و شرب و قراءه الموبايل و النوم بعمق احيانا كثيره و غيرها من الانشطه الرجاليه اليوميه ما عدا ( دخول الحمام مع ان معظم الرجاله بتحاول تلاقي اختراع يحل المشكله دي مستقبلا ) و هنلاقي اكيد 
 و في غياب زوجتي العزيزه في اجازه سنويه الي مصر ، عاده تصبح الكنبه بتاعتي هي كل حاجه بالنسبه لي  : مطعم و سينيما و مكتب لانجاز اعمالي و ومقهي بلدي لتدخين السجاير في البيت بدون ازعاج ، و احيانا كثيره غرفه نوم مريحه جدا ههههههه و ده حال معظم الرجاله و اللي يقول غير كده كذاااااب 

النهارده و انا شايل صنيه الفطار الصباحي المحمله بكم من السندويتشات و مج النسكافيه المعتبر و ماشي باصص علي التلفزيون و بحط الصينيه جنبي علي الكنبه ، و اوباااااااااا حصلت الكارثه !!!!!!!

مج النسكافيه الشقي وقع علي الكنبه ( الموووووف ) بشكل ترايجدي و طبعا عارفين كلنا ان بقعه القهوه من اصعب البقع ،،،،،،، 
حاله من الشلل التام حصلتلي و انا بتفرج علي المشهد ( Slow motion ) و مليون صوره بتيجي في راسي و صوت مراتي و هي بتصرخ ( وقعت القهوه علي الكنبه الموووووووووف يا يااااااااااااااااسر ) و بعد كده صورتها و هي جايبه ساطور من المطبخ و بتجري ورايا و انا بحاول انط من البلكونه و عنيا المملؤه بالدموع متعلقه بعيون بناتي حبايبي واقفين يعيطوا  و يصرخوا  باااااااااابا .........

وصحيت من تخيلاتي و جريت علي المطبخ محاولا الاستعانه بأي حاجه تنقذني من المصير المحتوم و فشلت كل المحاولات الهبله من اول الاستعانه بفانيش بتاع البقع الصعبه لحد المناديل المبلله بتاع الاطفال 

و جاتلي كذا فكره للنجاه من القتل عايز رأيكم فيها :
١- احرق البيت و اقول لمراتي انه حصل هجوم ارهابي عليا و انضرب صاروخ في الكنبه المووف و اتحرقت و اتهم داعش في هذه الجريمه لان اللون المووووف حرام و مظهر من مظاهر الكفر و العياذ بالله ؟ 

٢-ارمي الكنبه بره البيت و اقولها ان في حراميه دخلو البيت و سابو كل حاجه ( التلفزيونات و الموبايلات و الاجهزه ) و سرقوا بس الكنبه الموووف لان اخو الحرامي هيتجوز و مراته طلبت منه كنبه مووووووف و الا الجوازه هتبوظ ؟

٣- اتهم اخوها ( محمود ) ( خصوصا انها بتحب اخوها قوي فممكن تسامحه )ان لما جاني زارني وقع القهوه عليها  بالقصد لاني غلبته في اخر ماتش بلاي ستيشن و عمل كده علشان ينتقم مني ........و لو مسامحتوش اهو يشيل معايا المصيبه امال اموت لوحدي يعني 

٤- اتهم الشركه اللي اشترينا منها الكنبه من سنه ان ده عيب صناعه و انهم غشاشين و منشتريش منهم تاني ( و ربنا يسامحني علي الكذب اهو ضروره علشان انقاذ الارواح ) 

٥- اجيب فنانه تشكيليه تقنعها ان الموضه السنه دي في الكنب هو المووووف المبقع بلون القهوه 

المساعده يرحمكم  الله ، خليكم جنبي ، اقولها الخبر ازاي ؟

عموما اذا حصل في الامور امور احب بس اقولكم اني بحب الورد البلدي قوي فاللي يجيي يزورني في قبري امانه عليكم بوكيه ورد بلدي ، 

حبيبتي مراتي ، انا مستعد اشتري طقم كنب جديدبالكامل بس انتي و لا تزعلي ابدا صحتك بالدنيا يا عسل انتي ،  بلاش تهور