ايه هى سلامة النية, ايه المقصود بكلمة سلامه النية..

وايه المغزى اللى مفروض منها هل هى بتكون عن موقف والا بتكون احساس والا بتكون رد فعل والا تفاعل,,

بمعنى ان يعنى ايه نيه:  هل هى صفه ولا تكوين وجزء من شخصيه ولا كناية والا هى حد كان بينوى على حاجة  وإن كانت بسلامة نيه انه كان بيعملها ويقولها للخير, واحيانا فى مواقف لوم يتقال انا كنت بأعمل ده بسلامة نيه!

فهنا هل دى معناها ان  وارد ان الظروف اختلفت والنية اختلفت وفلتت منه, والا البصيرة مكنتش واضحة فى القرارات فخلت النية فيها غلوشة ,,فهنا تبقى نيه ولا نفسيه ولا ظروف متداخله عمت البصيره وسودت النفوس سواء بالانانيه او الطمع او الحقد اوالغيره او القسوه واشكال كتير ممكن يتشكل الشر منها!

من الجمال فى اللغة انك دايماً بتحسنها, فإيجابيتك بتقول بسلامة نية وحسن نيه وبنيه كويسة, قليل اوى لما حد يقول ده نيته وحشة واللى نيته وحشة بيبقى اساسا حياته بتبقى مش كويسة لأنه بيبقى مش شايف فيها غير نفسه, بتبقى نابعه من نفسيته, ممكن تبقى كلها حاجات غلط او شر بطريقة او بأخرى او عقد او ظروف مكركبه ... البنى آدم الحسن النية دايما متصالح مع نفسه مابيهموش حاجة, بيعيش حياته ببساطة بيقول اللى هو عاوزه, دايما بيتمنى الكويس لكل الناس بيتعامل من غير ما يفكر بيحاول يخدم على قد ما يقدر أو يدى على قد ما يقدر او يكون فى دماغه حاجة او مستنى مردود , بيبقى انسان متصالح مع نفسه حتى لو حياته مكركبه.. مابيفترضش الشك او سوء النيه مع ان فيه مشاكل كتير فى نفوس البشر ومش مفهوم فى اوقات كتير مردود مقياسها ازاى ورد فعلها, انت بس اللى تقدر تقيسها فى وقتها..

النيه مضمون هِمه إحساس ماتعرفش فيه الكلام جه من فين ولا تطبيقه ازاى, جه من فعل والا من موقف والا من حكاية والا جه من مردود حاجة فيها تفاعل وصدق والا من القلب صافى رسالته شفافه ووقعها بصمته قويه..

الانسان بطبيعته المفروض انه حسن النية مابيكونش عنده شر انما واضح ساعات ان فيه بنى آدمين بتبقى مش عارفة تفرق ما بين حسن النية والأذية بتاخد حسنى النية كمصدر لممارسة استمداد قوة من ايجابيتهم والتعامل بحسن نيتهم وهما يضمروا لهم ضعف النفس وسوء النية والتمتع بنشوه الاستهتار بحساسيتهم ونقاء تعاملهم.. دى حاجات كتير بقت فى حياتنا دلوقتى مواقف عدى فيها ناس كتير وأذت ناس كتير وصدمت ناس اكتر..

     النيه هى احساس وفعل وتطبيق فعل.. هى موقف

لو حد عمل حاجة بسلامة نيه من غير ما يفكر, وانطباع حسن ومردودها من اللى قدامه ماكنش صح للاسف خسر وانه اذاه ..لان النية مش فى كل وقت بتكون فيها الطرف الآخر نيته كويسة فتعامل الشخص سليم النية بيحطه فى مشاكل وممكن اللى نيته كويسه يكون عنده عدم بصيره او معندوش بعد نظر,  بمعنى انه معرفش يقيم الموقف صح فاتعامل معاه بسلامة نيه على انه بيقدر مثلا ويستاهل عطاؤه وطلع مش كده ... حد تانى مثلا اتعامل مع حد بحب وكان عطاء والتانى كان بيستغله فاكتشف انه كان بيستغله لحد ما أتأكد انه اللى قدامه مش بيقدر تحت محن الزمن.. فيه ناس تانية عندها المصلحة اهم شيء فى حياتها فبالتالى ده معندوش سلامة نيه من الاساس وبيقع ناس كتير للأسف فى شباكها ... ده غير ممكن توصل عمى بصيره واستغلال لواحد وحياه ويعيش معاها عمر وهى لا تمت له فعلياً بأى صله غير مصلحه واستفاده شخصيه ودى نماذج موجوده بينا ..

وفى نوع تانى من النيه وهى ما ينوى فعله من خير وندر وتغير حياه  الخ .. ولكن يندرج بعلاقه روحانيه  للخصوصيه مع نفسه اكتر.

سلامة النية دى حاجة فطرية بتخرج من البنى آدم من غير ما يفكر, انما استقبالها هو ده اللى بيفرق ... وتتقاس بالبنى آدم اللى هو نيته كويسة والا اللى هو نيته وحشه, وان اللى نيته كويسه فى الآخر بتكون هى طاغيه على تصرفاته ومن اصوله لها ايضا تاثير مباشر على اسلوب حياته..

اعتقد انه جزء من رد بان هل النيه صفه والا احساس والا تفاعلات والا من تكوينات الشخصية والا هى فكر وعصارة تجارب وبتطلع بتلقائية !هى حاجه كده مالهاش وصف بتخرج من القلب موجهه كالسهم لهدفها وفى نظرى النية الطيبة دى مفتاح حاجات كتيرة اوى,

بس هل النية اللى بتتولد جواكى دى فكر فطري تلقايئى من الظروف والمواقف اللى بتحط الشخص فيها ولا احساس تلقائى من غير تفكير!

هل هى دى تمشى فى الزمن ده والا دى تعتبر صيده لنفوس خبيثة..

وفى هذه الحاله تعتبر النية المحسوبة بفعل, لا تعتبر نيه ولا سليمة ولا تمت بصله لسلامة النية, لأن سلامة النية  بتخرج بتلقائية ولا مستنية مردود ولا مستنية كلمه, وتدرج تحت كلمه الخبث  هو النية الوحشة والطمع وسواد النفوس ومردودها للمتلقى مؤذى وجارح لأنه بيبقى فيها استغلال واهانه وتقليل شان لنفس انسان يستهان بطيبته ونقاؤه تلقائية عطائه..

مين فى الدنيا دى لسه بيتعامل بنقاء وحب وعطاء وسلامة نيه... اكيد فيه كتير, واكيد الناس حسني النيه فاهمين ومدركين,, ولكن هل هم رغم كل ده حيبطلوا يتعاملوا بحسن نيه  .. انا عن نفسى لا أعتقد!!

    مصرية