ايه الحكاوي دي ايه اللي بيجرى, فين الخلل, هل البني آدم هو اللي الغلط, ولا هو السبب, ايه اللي بيحصل في الأرض, ايه اللي بيحصل في الجو, ايه اللى بيحصل في البني آدم, ايه اللى بيحصل فى اللى حوالينا, ايه اللى بيحصل في المجتمع, ايه اللى بيحصل فى البلاد.... كله فيه لخبطة, لخبطة بتوجع امراض دمار خراب حروب كوارث طبيعية, داخلين على مجاعات, بس المجاعات لسه عليها شوية, إنما هي قربت بكارثة الولادة الكتير كثافة سكانية, انفاس البشر الهوا مش مستحملها..

البشر عمل حاجات صح وكتير أوى غلط, حاجات بقصد وحاجات مش بقصد .. التطور أذى, الأوزون لما إتخرم أذى, الطمع والحروب أذى, تخليق أمراض واستعمالها فى البني آدمين أذى, عدم الضمير أذى, وإطعام البني آدمين بالأكل المسرطن والبايظ والمسمم اذى, كأن فيه هدف لإبادة الناس بطريقة مستترة, بس الكوارث الطبيعية مفيهاش أهداف ولكن هيه ليها سبب..

أرض اتحركت, إحتباس حراري, تغيير مناخ, اوزون اتخرم, البلاد مليانه أدخنة ومليانة تلوث ومليانة حاجات تدمر أي بيئة, إحنا بنعمل ايه!

هل احنا بنساعد على دمار نفسنا ولا الانانية تملكت وعمت البشر ..

حكاوي حكاوي حكاوي حكاوي كلها توجع القلب وتدمع العين,

أعجز عن إنى أخرجها حتى على ورق أو بالكلام.

الأمراض بقت كتيرة أوى وفى الزمن ده بقت مكلفة أكتر, كأن المرض علشان منفعة ومصلحه لناس وناس تانية بتصنع العلاج وناس وناس وعمولات الخ, بقت زى البيضة ولا الفرخة والضايع الغلبان العيان بوجعه وروحه بتروح .. بيدور على انسانيه!! ما بقاش فيه انسانيه

ماكنش فيه الأمراض دي زمان, ولو كانت موجودة فهي كانت قليلة أوى, او جايز مش معروفه, او مش معلن عنها لاى ان كان اسباب, دلوقتى فى كل بيت فيه مرض ومدمن وبؤس وحكاية, ليه! إيه الاستفادة من كده.. الطمع والأذى والهيمنة القوه المال ...

المعاملات الانسانية مبقتش كمان كاملة, فيها حاجات بتنقص وبتقع وتقل وبتتغربل طول ماهو البني آدم عايش فى المجتمع المريض ده, بحكاوي كبار السن والأم والأب والأخ والخال والخالة والعم والجدة بجانب معاملات البشر مع بعض المؤلمه .... ومنها:

حكاية قريتها لست جميلة اللي كانت بترعى أسر كتير, كرست حياتها لاولادها واعمال الخير, كبرت وحبت تشوف ولادها ولان كل واحد كان فى بلد ومعندوش وقت يجيلها, ماتت وحيدة متحسرة بحسرة بُعد وقله وقتهم لرؤيتها, ولادها كل اللي همهم شهاده وفاه ليصرفوا فلوسها ويورثوها بعد موتها.. كانت عايشة في بيت عجزة, مقتدرة أه عايشة بفلوسها اه ما اتهانتش أه بس إهانتها الكبيرة في عيالها ... قريت القصة دي معرفتش أنام  صعبت عليا بأدعيلها بالرحمة, حكاوي كتير أوى من كده مبقاش فيه آدمية ولا انسانيه, الدنيا لاهية البني آدمين عايشين فى غفلة مش شايفين غير دنيتهم ومآسيهم وإحتياجاتهم وأنانيتهم واللي هما عايزينه وبس, احاسيسهم بتموت!!

غير في كل مكان فى مأساه يا بلد منهوبة يا بلد الكوارث مبهدلها يا بلد في حرب يا بلد الاقتصاد فيها تعبان يا بلد موبوءه, في كل حته فيها مشكلة, مبقاش فيه راحه وسلام.. السلام مش مقصود لصوت قنابل .. السلام ان أنا ابقى نايم مرتاح واصحى الصبح انا عارف حانزل ابتدى يومى طبيعى وفى الشارع أسلم على جاري بابتسامه وبأركب عربيتي وأنا آمنه وبأمشى في طريقى وأنا عارف إن حاوصل وأدخل مكتبى بالى مرتاح و باعمل شغلي بأمانه بأروح لعيلتي اللى مستنيني علشان نقعد ونضحك و نحكى عملنا ايه مش علشان نضغط ونطلب طلبات ونتمنى ..

إحنا كبرنا ليه .. هل البني آدم كل ما بيكبر مشاكله بتكتر وبيشوف حاجات أوحش مع العلم المفروض كل ما بأكبر بأرتاح وهمومى المفروض تقل, لأن خلاص تجاربي في الحياة وحياتى المفروض مسؤليتها بتبقى مرتبة ومنظمة من كل النواحي والجوانب على مستوى بيتى ومجتمعى وبلدى مش كل ما بأكبر بألاقى عندى مشاكل اكتر هموم أكتر ومسؤوليات أكتر هى دى سنة الحياة آه لكن مابتكونش بالضغوط الفظيعة دى, منظومة مشقلبة

ياللى فى بدايه حياتك ياللى إنت لسه صغير: عيش وانبسط وارتاح,  وماتعملش لنفسك مشاكل لأن المشاكل حتجيلك وإنت كبير, ومشاكلك وإنت صغير دى هايفة أوي,  بس متبقاش أنانى خليك عطوف حب نفسك وحب اللى حواليك كمان وماتفضلش نفسك على حد علشان إنت  ماتسواش حاجة من غير حد ....

اما الكوارث الطبيعية من زلازل على براكين على فيضانات على حرايق على رياحو اعاصير, مأساة وغير متوقعه ابعدها ربنا يلطف بيها ومآسيها جامدة جدا.. الأمطار والرياح والجو المشقلب والحرارة حا نقدر نستحملها لحد إمتى ، في بلاد حرارتها حاتزيد وتعلى جامد حايهاجروا ويمشوا منها علشان محدش حايقدر يعيش فيها, هل إحنا حنرجع للعصور القديمة بنحارب بعض علشان الأرض والمية,  هل اتعمل أى نوع من انواع التخطيط مع تغير المناخ للمستقبل,  ولا سايبنها مفاجأة علشان الناس تحارب بعض وتتخانق مع بعض والبقاء للأقوى, وأهو منها يخففوا شوية سكان من على الأرض، أكيد مش فى زمانا على الأرض الأيام دي بس حاتبقى وقت صعب أوى ووقت مهين أوى لأن البني آدم على الأرض دلوقتى بقى مرفه ماتعودش على العيشة الصعبة علشان كده لما بيجرى أى حاجة غير اللى هو متعود عليها بتلخبط وتقلق عيشته..  بتبوظ لأنه مبيقدرش يتعايش وبيبتدى يتذمر لأنه خلاص بقى مرفه, مش زى اللي عايش فى صحرا ولا عايش في غابة ولا عايش في مناطق قاسية بيتكيبفوا مع طبيعتهم ومايعرفش يعيش عيشتك المرفهة لأنها بالنسبة له مالهاش قيمة.. القيمة عندك مش عنده, لأنك خلاص ماتستحملش تعيش العيشة دى ، عيشته أصح ولكن صعبة أوى ..

نسب الأمراض مع الحياة الطبيعية تقريبا مش موجودة أو نسبتها ضئيلة أوى عندهم, إحنا عملنا عيشتنا, إحنا البني آدمين إحنا الإنسانية والآدمية اللي إتعدمت, حتى لو إنت عندك شعور, الشعور بقى مش موجود  لمدة طويلة بقى حاجه وقتيه, رمزية, بواقي شعور، وبيقل..   حانعمل إيه حانلحق نفسنا ولا خلاص حانكمل بقيه الصفحة بالمنظر ده وحايتقال بسلبية ده قدرنا أو خلاص إحنا منقدرش نعمل حاجة مع العلم إحنا ممكن نعمل حاجات كتيرة أوى بس هل فى القوة او إرادة نفس بإن إنت عاوز تتغير وتغير مناخك وتغير حياتك بس حتاخد وقت هل تقدر هو ده السؤال: هل نقدر ننفذ البشرية؟ هل نقدر ننقذ ارضنا؟

محاولات من زمان لإنقاذ الأرض, كلها بقت في الهوا, صحيح فيه لسة انا مابقولش مفيش ، ولكن مش بنفس الكم اللى المفروض يكون ... في بلاد بتحاول

بلادنا صعب انها تحاول ,, بلادنا يا دوبك عايزه تاكل وتشرب وتعيش

ما هو كمان ماينفعش نيجي لبلد نقولهاGo green وهي مش فاهمة green يعني إيه أصلا

هي ينفع نقولها go yellow لآن برضه البيئة الصحراوية صحيه, لان لازم نمشى مع كل فكر بلد, ويكون صديق البيئه, ويفروا طاقه, وفلوس, ويحدوا من التلوث, بس مش حيقدروا يبقوا لا green ولا yellow لأن هما عابزين Go living, Go survive   عايزين يعيشوا وبس ...

المقياس مش بس عندنا, أقصد المقياس في كمان بلاد كتيرة بتعانى وتحت ضغوط ..

قلبى واجعنى اوى على الناس اللي بتموت وعلى الغدر وعلى عقوق الأب والأم ومقهورة,  وعلى اللى مش عارف ينام ويتغطى وعلى اللي بيهرب من النار وينزل المية فيغرق وعلى اللي نايم في سريره وقنبله تفرقع وعلى الولد اللي ماسك طوبة وبيضرب رصاصة وعلى حاجات كتيرة أوى موجوعه... والراجل اللي بيركب أتوبيس ونصُه بره علشان يجيب قوت ولاده والست اللي شايلة مشنه وبتفرش في مكان علشان تأكل عيالها والبيه اللي بينزل بكرافته بيتهان علشان مبقاش عارف يكفي قوت عياله فإبتدى يقلع الكرافتة ....موجوعه

رايحين فين يا بشرية .. رايحين لفين يا بشرية... إنقذوا نفسكم وكل واحد ينقذ نفسه علشان نعرف نعيش كلنا, هوانا اتغير ,الأرض بتغلي, خافوا وراجعوا ضميركم ونفسكم, وفكروا في المستقبل, وإزاي نقدر نكمل ونعيش على كوكبنا.. أرضنا!!