لو كل امبارح حلو يبقى النهارده حلو, علشان النهاردة حلو وعلشان النهارده يوم كله أحداث وكله مواقف وكله تعاملات وكله أحاسيس وكله عيشة,  بنلاقي كل يوم بيعدي بكل اللى بيجرى جواه وفيه تفاعلات كتيرة أوى, اليوم كأنه سنه كأنه دهر كأنه عمر بحاله.. كل ثانية هي بتعتبر حياة وكل نفس يعتبر إحساس وكل كلمة بتبقى موقف وتعامل ....
حياتنا كلها ثانيتها و دقيقتها و ساعاتها هى مجراها بنمشى وبيدور محورها على من حولنا وأحداث ما يجرى فى مجتمعنا وعيشتنا وأسلوب حياتنا.. وفيها تعاملات على المستوى الشخصى وتعاملات على المستوى العاطفى وتعاملات على المستوى الانسانى وتعاملات كتيرة غيرها بتدور وهى دى الحياه, وان كل بنى آدم عايش يحس بيها كأنها نوع من روتين,  وان الايام بتعدى والمواقف بتكتر والاحداث كمان بتزيد, وفى تغيرات كتيرة أوى بتحصل في اليوم والعيشة والدنيا بيبقى ليها تأثيرات مباشرة وغير مباشرة على الواحد فى عيشته وتعاملاته مع اللى حواليه وتعاملاته مع الناس وتعاملاته في المجتمع وتعاملاته في الدنيا عموما.. هو مخلوق عايشها مش مقدرها!!
لحظة البني آدم في حياته مهمة جداً, اليوم بالنسبة له ده بيعتبر كحق مكتسب او هو كده, طالما ان فيه نفس في يوم في عيشة فى حياة ..
الاحداث مع السنين بقت بتتغير بسرعة أوى, والأيام ودورتها بالشهور والسنين بقت سريعة أوى.. في أيام بيبقى ريتمها بطيء وفى أيام ريتمها سريع وفى أيام بتبقى قاسية وفى ايام بتبقى لطيفة وفى ايام مليانه سرور وبهجة وفى ايام بتبقى مضغوطة, وفى يوم بيبقى فيها كل الكلام ده.. 
اليوم في حد ذاته في بعض الأوقات بيبقى منسى, في حاجات بتحصل فيه بتلقائية بتبقى لا مدروسه ولا ومحسوسة ولا معمول حسابها بتمشي لوحدها اتوماتيك.. البني آدم مقياسه لحياته دايما بتبقى على حسب إحتياجاته واحلامه وطموحه,
 يوم البني ادم ده يوم له قيمة جامدة جداً, وثانية عيشة البنى آدم تساوى كتير..
اللطيف في الموضوع إن البني آدم دايما بيقول زمان كان حلو, وممكن زمان ده يبقى الحقبة بتاعتها مش بعيده أوى, فإذا كان زمان ده كان حلو فيبقى هو النهاردة  حلو لأن هو النهارده ده حايبقى الزمان بعدين.. فمن الأحسن إن البني ادم يحاول يحلى عيشته في يومه ويتعامل بيه لأنه هو اللي حايكون ده بالنسبة له زمان بعدين, فاعلشان مايكونش عنده ندم وحسره على اللى فات, فضرورى يحاول يعيشه دلوقتي بكل الامكانيات وبكل القدرات اللى يقدر يعيشها, على الأقل حايكسب حاجتين, حايكسب حياته دلوقتى وذكرياته زمان ويبقى مبسوط بيها, حتى لو فيه ضغوط حتى لو فيه قسوة فى الحياة حتى لو فيه مشاكل, حاول دايما تلاقي نور وبريق يخلى يومك حلو وسعيد ..
مع الحياه الصعبه: النظام والراحة والرضا من المفاتيح, نحاول نستعملهم مع عطاء ونضيف عليهم شوية نضافه مع رشه ابتسامه لتحلى عيشتكم, علشان اما احكى يومى لزمانى يقول كانوا احلى.. ونهاركم ويومكم سعيد
مصرية